PASAMBAHAN(7) MAMPAIYOKAN "BAKARILAAN"  

DATUAK :

Muncak nan ambo imbau !

Baitu mah Muncak, baa nan kato mandatangan rundiangan alek nan datang kabakeh kito, tahojok undiangan kabakeh ambo, baa jokok diambo undiangan nantun nasakah gayuang alun basambuik, kato nan baru bajawab, undiangan alun bapulangan, a nyo nan lai, janji nan batiboan kabakeh alek nan datang, dek alek nan datang lah mananti dek ambo itu nan bapaiyokan kabakeh Muncak, tantang gayuang kamanyambuik, kato nan kamanjawab, undiangan nan kamamulangan, basarahan kabakeh Muncak, tapi sungguahpun Muncak, aratinyo bana sado nan sakarek dimudiak, nan ambo ibaraik nasi bakadang, manuruik jo nyoh, sakian bana

MUNCAK :

Lah sampai Mak ?

Baa nan kato mandatangan undiangan Mak Datuak kabakeh ambo, sapanjang pasa nan biaso, manuruik adaik, undianagn Mak datuak ibaraik gayuang capek tasambuik, kato capek tajawab, undiangan lakeh tapulangan, dek tasabuik pulo dek Mak Datuak ambo baduo batigo sakarek dimudiak, iyo handak bajalan baiyo bakato bamolah ambo dulu, istirahaik dipintak, baiyo ambo dahulu, kabaa pulo tu Mak Datuak ?, sakian bana

DATUAK :

Lah sampai Muncak ?

Baa nan kato Muncak tadi, dek tasabuik dek ambo Muncak baduo batigo sakarek dimudiak, iyo handak bajalan baiyo bakato bamolah Muncak Dahulu, istirahaik dipintak, baiyo Muncak dahulu, kan baitu ?

dek ambo Muncak, lakek sapatah pituah tuo pamenan kami rang mudo matah< Limbayuang ditapi lauik, sigaga digunuang arab, siambek dibukittingi, asa gayuang lai kabasambuik, kato lai kabajawab, lamo jo lambek ambo nanti, sakian bana

MUNCAK :

(manpaiyokan suok kida)

MUNCAK :

Mak Datuak !

Baitu mah Mak Datuak, baa nan kato mandatangan undiangan Mak datuak kabakeh ambo, baa nan undiangan nantun ibaraik gayuang alun basambuik, kato nan baro bajawab, undiangan alun bakumbalian, a nyo nan lai, janji nan batiboan kabakeh Mak Datuak, dek Mak Datuak lah manati, dek ambo alah pulo bapaiyoan, baa tantang paiyoan ambo tu, lah bulek aie kapambuluah, lah tajun aie kapamatang, bulek lah buliah digolek an, picak lah buliah dilayangkan, lah saiyo kaji tantang nantun, tantang gayuang kamanyambuik, kato kamanjawab, mamulangan undiangan ka Mak Datuak pun sakali iyo tatumpah pulo kabadan diri ambo, kabaa pulo tu Mak Datuak, sakian bana

DATUAK :

Lah sampai Muncak ?

Baa nana kato Muncak, baa nan kato amandatangan undiangan ambo kabakeh muncak, baa nan undiangan nantun ibaraik gayuang alun basambuik, kato nan baru bajawab, undiangan alun bakumbalian, a nyo nan lai janji nan batiboan kabakeh ambo, dek ambo alah mananti dek Muncak alah pulo bapaiyoan, dapek sapakaik Muncak, kok bulek lah buliah digolek an, picak lah buliah dilayangan, lah saiyo kaji tantang nantun, tantang gayuang kamanyambuik, kato nan kamanjawab, nan kamangumbalian undianangan pun sakali, iyo tatumpah dibadan diri Muncak, kan Baitu ?

dek ambok Muncak, dima bijo lai katumbuah, dima tabik lai kabaisi, dinan lain lai ambo nanti, kok kini lah di Muncak bana, insyaallah

MUNCAK :

Lah sampai Mak Datuak ?

Baitu Mak Datuak, baa nan kato mandatangan undiangan alek nan datang kabakeh kito tahojok undiangan kabakeh Mak Datuak, baa nan undiangan nantun ibaraik gayuang alun basambuik, kato nan baru bajawab, undiangan nan laun bapulangan, a nyo nan lai janji nan batiboan kabakeh alek nan datang, dek alek nan datang alah mananti dek Mak Datuak itu nan bapaiyoan kabakeh ambo, kan baitu ?

dek karano Mak Datuak Juo nan jauah tampak asok, nan dakek tampak api, bajabek daun bajumbai aka antaro jo alek nan datang, elok lah Mak Datuak juo nan mamulangan, nan ambo Mak, ibaraik malam duo puluah tujuah, lah kabue pamandangan, sakian bana

DATUAK :

Lah sampai Muncak ?

baa nan kato Muncak tadi, dek karano ambo juo nan jauah tampak asok, nan dakek tampak api, bajabek daun bajumbai aka antaro jo alek nan datang, elok lah Mak Datuak juo nan mamulangan, nan ambo Mak, ibaraik malam duo puluah tujuah, lah kabue pamandangan, kan baitu ?

Amuah bana ambo mamulangan undiangan ka alek nan datang nan sakali kini, akan tetapi, cameh juo ambo kaanyuik, gamang juo ambo kajatuah, kok senteang yo mintak dibilai, lamah mintak ditawue, kurang takana mintak ditimbue an, kok li lai sado itu, insyaallah ambo pulangan, sakian bana

MUNCAK :

Lah sampai Mak Datuak ?

Amuah bana Mak Datuak mamulangan nan sakali kini yeh, akan tetapi, cameh juo Mak Datuak kaanyuik, gamang juo Mak Datuak kajatuah, kok senteang yo mintak dibilai, lamah mintak ditawue, kurang takana mintak ditimbue an, kok li lai sado itu, insyaallah Mak Datuak  pulangan, kan baitu ?

dek ambo Mak, kok li lai dek ambo lamah kapanawue ambo tawue, kok ado dek ambo kurang kapanukuak, ambo tukuak, kok kurang takana ambo timbue an, kok ateh nan indak Mak, iyo undiangan Mak Datuak juo nan ambo tuahi nyoh, sakian bana

DATUAK :

Ambo mintak ateh nan lai nyo Muncak

MUNCAK :

Kok ateh nan lai Mak, indak rago mamintak Mak Datuak doh, ibaraik mananam pisang, alun pisang karabah, panupang lah ambo ase kan

DATUAK :

Baa iyoambo pulangan ?

MUNCAK :

Insyaallah Mak !

PASAMBAHAN(6)  BAKARILAAN (ALEK JO Pangka )

ALEK :

 Pak Datuak nan ambo imbau !

Kini baitu Pak Datuak !, nan kato ambo kamambaco undiangan, tumbuah nan baknangko kito baundiang dalam alek, lapiak putiah lah takambang, agi lah tagendeang, tirai lah tagantuang, siriah carano lah talatak dihadan kito, tumbuah handak e kan tabaoan rukun jo saraik e, a bana  lah rukun jo saraik e tu, bataratik jo manjilih, balelo jo kurenah, sambah dipakai, tangan diinjiang, sambah manyambah rang namokan, mangko undiangan dibaco, sabuliah buliah pintak ambo,tantang taratik jo manjilih samo kito baoan, lelo jo kurenah samo kito pakai, nan ambo pintak bana tantang sambah jo injiang tangan, baa ruponyo dek ambo lakek sapatah pituah tuo, pamenan kami rang mudo matah, kambie sabatang ditapi lereang, babuah satandan limo, dipanjek anak rang taratak, pihak tantang pado sambah didalam adaik dipamulie, tangan nan indak ambo injek, sahinggo undiangan sajo ambo baco, disinan siriah ambo siriahkan, sakian bana

PANGKA :

Lah sampai Palo Mudo !

Kini baitu Palo Mudo, didalam barih nan balabek, didalam cupak nan bagantang, sapanjang pasa nan biaso, kato palo mudo dijawab capek, undiangan dipulangan lakeh, kan baitu ? disabuik juo mangaji batarikaik, putuih ilimu banasakah, adih diagiah badalie, kato diagiah bamisa, dimisakan urang turun kasawah, rancak sawah dek pamatang, rato sawah dek basikek, luruih batanam dek bapandang, a banal ah aratinyo, supayo manyawuak tantang nan janiah, mamnjujuik tantang nan salasai, bajalan nan baiyo ambo dahulu, mananti Palo mudo sabanta, sakian bana

ALEK :

Lah sampai Pak Datuak !

Kini baitu Pak Datuak, ateh bana lilahinyo, kato ambo dijawab capek, undiangan dipulangan lakeh, kan baitu ? baa ruponyo dek ambo, dijawablah kato Pak Datuak agak sapatah, apolah kato kajawab e. didalam luhak tanah data dalam kampuang bungo satangkai, disinan tabuah puluik-puluik, iyo bagudang saliguri, lapiak banamo siilalang banamo lapiak kasifirang jadi kabasaran dinagari, supayo handak manyawuak dinan janiah, manjujuik dinan salasai, capek indak dapek dek baguluik, lambek indak dapek dihinggoi, bajalan baiyo bakato bamolah Pak Datuak  dahulu, nan ambo sifaik mananti, kan baitu ? dek ambo Pak Datuak, asa undiangan ambo lai bapulangan, insyaallah ambo nanti, sakian bana

PANGKA mampaiyokan undiangan kabakeh Urang sumando, lihat : Mampaiyoakn bakarilaan

PANGKA :

Palo Mudo !

Baa nan kato mandatangan undiangan Palo Mudo kabakeh ambo, baa nan undiangan nantun ibaraik gayuang alun basambuik, kato nan baru bajawab, undiangan alun bapulangan, a nyo nan lai janji nan batiboan kabakeh Palo Mudo, dek Palo Mudo lah mananti dek ambo alah pulo bapaiyoan, dapek sapakaik kami nan disiko, kok bulek lah buliah digolekan, pikak lah buliah dilayangkan, lah saiyo kaji tantang nantun, tantang gayuang kamanyambuik, kato nan kamanjawab, undiangan nan kamamulangan kabakeh Palo Mudo, iyo diambo pulo tarabik e komah, kabaa pulo tu, sakian bana

ALEK :

Lah sampai Pak Datuak?

Baa nan kato Pak Datuak Tadi, dek karano mandatangan undiangan ambo kabakeh Pak Datuak, baa nan undiangan nantun, ibaraik gayuang alun basambuik, Kato nan baru bajawab, undiangan alun bapulangan, a nyo nan lai, janji nan batiboan kabakeh ambo, lah dapek sapakaik Pak datuak disinan, tantang gayuang kamanyambuik, kato nan kamanjawab, undiangan nan kamamulangan kabakeh ambo, di Pak Datuak bana tarabik e, kan baitu ?, ba jokok diambo, asa tumbuah lai kaboneh, asa bijo lai katumbuah, manitiak ambo tampuang, mailie ambo palik, dinan lain lai ambo nanti, kok kunun di Pak Datuak bana , insyaallah, sakian bana

PANGKA :

Lah sampai Palo Mudo ?

Ambo sabuik bana kato nan tadi dibaliak kato nan kini, kok indak disabuik kato nan tadi dimalah kato kadapek e, Baa nan kato Palo Mudo kamambaco undiangan, tumbuah nan baknangko kito baundiang dalam alek, lapiak putiah lah takambang, agi lah tadendeang, tirai lah tagantuang, siriah carano lah talatak dihadan kito, tumbuah handak e kan tabaoan rukun jo saraik e, a bana  lah rukun jo saraik e tu, bataratik jo manjilih, balelo jo kurenah, sambah dipakai, tangan diinjiang, sambah manyambah rang namokan, mangko undiangan dibaco, sabuliah buliah pintak Palo Mudo, tantang taratik jo manjilih samo kito baoan, lelo jo kurenah samo kito pakai, nan Palo Mudo pintak bana tantang sambah jo injiang tangan, baa ruponyo dek ambo lakek sapatah pituah tuo, pamenan kami rang mudo matah, kambie sabatang ditapi lereang, babuah satandan limo, dipanjek anak rang taratak, pihak tantang pado sambah didalam adaik dipamulie, tangan nan indak ambo injek, sahinggo undiangan sajo Palo Mudo baco, disinan siriah Palo Mudo siriahkan, 

Baa jokok diambo, kalau lah kito pabacoan, sipaik alah bapakai, sakian bana

ALEK :

Baa Pak Datuak, iyo ambo baco

PANGKA :

INSYAALLAH

Selanjutnya Lihat : PASAMBAHAN SIRIAH KAMPIE

 

 

 

 

 

PASAMBAHAN(5) MALUANGAN JALAN ( PANGKA JO ALEK )

PANGKA :

 Palo Mudo !,

 kini baitu Palo Mudo, disabuik juo kato tadi dibaliak kato nan kini, kok indak disabuik kato nan tadi , dimalah kato kadapeknyo, satempo diawanyo tadi rundiangan Palo Mudo, ibaraik gayuang alun basambuik ,kato alun bajawab, rundiangan alun bapulangan, a nyo nan lai janji nan batiboan, dek Palo Mudo lah mananti dek ambo alah pulo bapaiyoan, baa tantangan paiyoan ambo tu, lah dapek bulek sagolek, picak salayang, lah bulek aie kapambuluah, lah tajun kasiak kapamatang, lah saiyo kaji tantang nantun, tantang gayuang kamanyambuik ,kato kamanjawab, rundiangan kamamulangan kabakeh Palo Mudo, iyo diambo bana tarabik e, kabaa pulo kolah Palo Mudo ?. sakian Bana

ALEK :

Lah sampai Pak Datuak ?.

Baa nan kato Pak Datuak tadi, disabuik juo kato tadi dibaliak kato nan kini, kok indak disabuik kato nan tadi , dimalah kato kadapeknyo, satempo diawanyo tadi rundiangan ambo dek Pak datuak, ibaraik gayuang alun basambuik ,kato alun bajawab, rundiangan alun bapulangan, a nyo nan lai janji nan batiboan, dek ambo lah mananti dek Pak Datuak alah pulo bapaiyoan, baa tantangan paiyoan Pak Datuak tu, lah dapek bulek sagolek, picak lah salayang, lah bulek aie kapambuluah, lah tajun kasiak kapamatang, lah saiyo kaji tantang nantun, tantang gayuang kamanyambuik ,kato kamanjawab, rundiangan kamamulangan kabakeh ambo, iyo di Pak Datuak bana tarabik e, kan iyo baitu ?

Baa dek Ambo Pak Datuak, Anak murai, anak Barabah, bakaja-kaja dibangka kambie, bak mulai bak sudah, bawa mangko baakie, diawa e tadi Pak Datuak handak baiyo, kini alah Pak Datuak pulo nan mamulangan, alah diasuak manjaiyau, alah dikasau lakek atok tu mah pak datuak, sakian bana

PANGKA :

Lah sampai Palo Mudo !

kini baitu Palo Mudo, baa ruponyo dek ambo ado juo usuah nan mangaya, satia panjang nan manyudahi ateh badan diri ambo, takalo kamamulangan undiangan Palo Mudo, kok ateh bana lilali e, elok baliak e nan bak mamanggang, elok ulang e nan bak manyapuah, lalu taulang tajajaki, taampeh tampajai, sabanyak lubang tuga, sabanyak cicie, sabanyak kato sabanyak jawab,sabanyak undiangan sabanyak pulangan e,  kan baitu handak e, baa ruponyo dek ambo, antah ciek jo duo sajo kato kajawab e, kabaa pulo sipaik badan diri ambo Palo Mudo ?

ALEK :

Lah Sampai Pak Datuak !

kini baitu Pak Datuak, sapanjang kabanaran Pak Datuak Tadi, kok kalam indak kabasigi, lakuang indak kabatinjau, baa rupo e dek Pak Datuak antah ciek jo duo sajo undiangan ambo kapulangannyo, kan baitu Pak Datuak ?. baa rupo e dek ambo, asa lai kato kabajawab, undiangan kabapulangan, sapatah kato basadangan Pak Datuak, asa lai akok indak malampaui taro.

PANGKA :

Lah sampai Palo Mudo !

kini baitu Palo Mudo, disabuik juo kato tadi dibaliak kato nan kini, kok indak disabuik kato nan tadi , dimalah kato kadapeknyo, baa nan kato Palo Mudo tadi, karano kito lah barokok rokok an sabatang sorang kan iyo alah, baa kini dek karano ari lah barambang lauik, barnamo lai takana dihati tacinto dipikiran, handak mambaco undiangan jo papalan, diateh kato nan bana, baa dek ambo Palo Mudo, kok yo lilai nan takana dek Palo Mudo, bacolah, nan kami danga pulo basamo, ibaraik jalan baluangan, sakian bana

ALEK :

Sampai Pak Datuak !

Baa nan kato Pak Datuak tadi, kok lilai dek ambo nan takana dihati, tacinto dipikiran, ateh nan bana,bacolah, kan baitu Pak Datuak ? ambo iyo nak mambaco mah Pak Datuak

PANGKA :

Insyaallah bacolah !
Baca juga :

PASAMBAHAN(4) MAMPAIYOAN ( PANGKA JO URANG SUMANDO )

PANGKA : 

            Sutan Batuah nan ambo imbau !

URANG SUMANDO :

            Ambo Mak !

PANGKA :

Kok bisiak lah kadangaran, kok sorak lah kalampauan mah sutan!, aratinyo bana, mandatangan rundiangan mak datuak kabakeh kito, tahojok rundiangan kabakeh ambo, baa nan rundiangan Mak Datuak tu, ibaraik gayuang alun basambuik, kato alun bajawab, rundianagn alun bapulangan, a nyo nan lai, janji nan batiboan, nan manjadi bana dek ambo  kini, tantang gayuang kamanyambuik, kato kamanjawab, rundiangan kamamulangan kabakeh Mak Datuak, iyo basarahan kabakeh Sutan Batuah, sungguahpun baitu sarapek papek e lah urang sumando kami sapaduduakan nangko, nan ambo Sutan, ibaraik masin jo garobak, masim bajalan, garobak mairiang. Sakian bana Sutan

URANG SUMANDO :

Lah sampai Mak !

PANGKA :

Babilang alah Sutan Batuah

URANG SUMANDO :

Baitu mah Mak ! sapanjang pasa nan biaso, karajo sorang babulek I, karajo basamo bapasamoan, baa kini karajo basamo ito ambo nak mampasamoan, mananti Mamak sabanta, baiyo ambo dahulu, sakian bana

PANGKA :

Nan mausuah manggamang dibadan diri ambo iyo kato nan sapatah tu mah Sutan !, ma ruponyo, karajo sorang kok indak babulek I, karajo basamo kok indak bapasamoan, baa ki9ni karajo sorang kan lai babulek I, karajo basamo kan lai bapasamoan, insyaallah Sutan, ambo nanti jo parundiangan.

URANG SUMANDO BAIYO

Ajo !, ajo juo nan ambo imbau, aratinyo bana, kok sorak lah kalampauan, kok bisiak lah kadangaran, pulangan rundiangan dek Ajo, nan ambo sato didalam

JAWAB URANG SUMANDO LAIN :

Pulangan jo lah rundiangan tu dek Sutan, nan kami ibaraik karisiak, malakok kabatang

URANG SUMANDO :

Baitu ?, ba iyo ambo pulangan ?

JAWAB URANG SUMANDO LAIN :

Insyaallah !

URANG SUMANDO KA PANGKA :

Baitu Mak !, baa nan kato mandatangan rundiangan mamak tadi kabakeh ambo, baa nan rundiangan Mamak tu ibaraik gayuang alun basambuik , kato alun bajawab, rundiangan alun bapulangan !, a nyo nan lai, janji nan batiboan, dek Mamak lah mananti, dek ambo alah pulo bapaiyoan, tantang gayuang kamanyambuik, kato kamanjawab, rundiangan kamamulangan kabakeh Mamak, iyo tatumpah kabadan diri ambo, baa pulo tu Mak ?, sakian Bana

PANGKA :

Dek ambo Sutan !, asa rundiangan lai kabapulangan, kok sia sia nan kamamulangan ambo tarimo suko, dinan lain lai ambo nanti, kok kunun lah di Sutan bana, dengan insyaallah Sutan,

URANG SUMANDO :

Baitu mah mak !, baa nan mandatangan rundiangan Mak Datuak tadi kabakeh kito, tahojok rundiangan kabakeh mamak !, kan iyo baitu mak !. baa nan rundiangan tu ibaraik gayuang alun basambuik, kato e alun bajawab, rundiangan alun bapulangan !, a nyo nan lai janji nan batiboan, tantang gayuang kamanyambuik kato kamanjawab, rundiangan kamamu;langan kabakeh Mak Datuak basarahan kabakeh ambo, kan iyo baitu Mak ?,

Baitu Mak !, dek lah Mamak juo nan dakek tampak api, nan jauah tampak asok, nan bajawek daun bajumbai aka antaro jo Mak Datuak,  elok lah Mamak juo nan mamulangan, nan ambo Mak !, kok takuruang samo didalam, tahimpik samo dibawah, sakian bana Mak.

PANGKA :

Baitu Sutan !, nan sakali kini lai amuah ambo mamulangan, akan tatapi, kok senteang yo mintak dibilai, lamah tolong ditaue, kurang takana tolong tibue an.

URANG SUMANDO :

Kok li lai dek ambo senteang kapambilai, ambo bilai, kok indak Mak, baa panitahan Mamak ambo tuahi, sakian bana

PANGKA :

Baa, iyo ambo pulangan ?

URANG SUMANDO :

Insyaallah Mak !  

PASAMBAHAN(3) MAMPAIYOAN ( PANGKA JO PANGKA  )

 PANGKA 1 :            
                       Yuang Dancin ambo imbau !

 PANGKA 2 :

                       Ambo Mak Datuak !

 PANGKA 1 :

                 Baa nan kato mandatangan rundiangan, alek nan datang kabakeh kito, tahojok rundiangan kabakeh ambo,a banal ah parundiang e, dek hari lah barambang lauik, barnamo lai takana dihati, tacinto dipikiran, handak mambaco rundiangan jo paparan, alah kabana dibaco . baa dek ambo nan rundiangan tu, ibaraik gayuang alun basambuik, kato alun bajawab, rundiangan alun bapulangan, a nyo nan lai, janji nan batiboan ka alek nan datang, dek alek nan datang lah mananti, dek ambo itu nan bapaiyoan kabakeh Yuang Dancin, tantangan gayuang kamanyambuik, kato kamanjawab, rundiangan kamamulangan kabakeh aleh nan datang tatumpah kabadan Yuang Dancin, tapi sungguahpun Yuang Dancin tasabuik dek ambo, aratinyo bana kasadonyo nan duduak sakarek di darek sarato urang sumando, sakian bana.

 PANGKA 2 :

                       Lah sampai Mak Datuak ?

PANGKA 1 :

                        Babilang alah Yuang Dancin !

 PANGKA 2 : 

                    Baa nan kato Mak Datuak tadi, dek karano mandatangan rundiangan alek nan datang kabakeh kito, tahojok rundiangan kabakeh Mak Datuak, baa nan rundiangan tu dek mak Datuak, ibaraik gayuang alun basambuik, kato alun bajawab, rundiangan alun bapulangan, a nyo nan lai, janji nan batiboan kaalek nan datang, dek alek nan datang lah mananti, dek mak Datuak, itu nan bapaiyokan kaambo, tantang gayuang kamanyambuik, kato kamanjawab, rundiangan kamamulangan kabakeh alek nan datang tatumpah kabadan diri ambo, kan iyo baitu ?,

                    Dek tasabuik dek Mak Datuak, ambo baduo batigo sakarek didarek ko sarato urang sumando, iyo handak manariak ambo kato jo mufakaik nak maola kato jo kabanaran, mananti Mak Datuak sabanta, mufakaik kami dahulu, sakian bana

                        

                        

PANGKA 1 :

                         Insyaallah Yuang Dancin !

PASAMBAHAN(2) PAMBUKAK KATO (PANGKA JO ALEK )

ALEK  :

                Pak Datuak !

PANGKA :

                   Ambo Palo Mudo!

 ALEK :

                Baitu mah Pak Datuak! Dek karano kito lah barokok-rokok an sabatang sorang, kan iyo alah !,          baa kini dek karano  hari lah barambang lauik barnamo lai takana dihati, tacinto dipikiran, 

                   handak mambaco rundiangan jo papalan, tahadok e kabakeh pak Datuak, sungguahpun pak  

                 Datuak sorang nan taimbau dek ambo, aratinyo bana Pak Datuak nan baradiak kakak,bamamak

                  kamanakan, sarato urang sumando, alah kabana dibaco pak Datuak ?  

PANGKA :

                   Sampai Palo Mudo ?

ALEK :

                 Sakiro alah Pak Datuak !

PANGKA :

                 Palo Mudo !. baa nan kato mandatangan rundiangan palo Mudo tadi kabakeh ambo, baa nan 

                 rundiangan palo mudo tu, handak–handaknyo manuruik adaik, capek tajawek capek tapambai !.

                baa kini dek karano tasabuik  dek palo mudo ambo baduo batigo nan baradiak kakak,bamamak

                kamanakan saroto urang sumando, iyo ambo bajalan nak baiyo, bakato nak bamolah,mananti

                palo mudo sabanta, baiyo ambo dahulu, baa pulo kolah, sakian bana

ALEK :

               Sampai Pak Datuak ?

PANGKA :

                   Babilang alah Palo Mudo !

ALEK :

               Nan mausuah manggamang dibadan diri ambo kan iyo kato nan sapatah tu Pak Datuak, 

               ma ruponyo! Karajo sorang kok indak babulek I, kajo basamo kok indak bapasamoan, baa kini 

               karajo sorang lai babulek I, karajo basamo lai bapasamoan, mah Pak Datuak bajalan nak baiyo, 

               bakato nak bamolah, mananti ambo sabanta, baiyo Pak Datuak dahulu, kan iyo baitu ?. 

              dengan insyaallah, Pak Datuak, ambo tunggu jo parundianangan.

PASAMBAHAN( 1) ROKOK ( ALEK JO PANGKA )

 ALEK :
                Isok rokok ambo Pak Datuak

PANGKA :

                      Iko rokok ambo, kapalo mudo

ALEK :

                Baa tantang pado rokok pak Datuak ?

PANGKA :

                    Samo- samo kito isok

ALEK :

                    Kini baitu Pak Datuak, Tantang pado rokok, jalan e diagiah baanti, kato e diagiah basudah,

                    rundiangan tantang pado rokok nan sakali kini kito alahan dulu ? 

PANGKA :

                    Insyaallah, kapalo mudo